mércores, 17 de decembro de 2014

A DERRADEIRA XUNTANZA DO ANO

Ola rapaces! Onte tivemos a xuntanza correspondente a lectura de decembro que, como sabedes, sufriu modificacións en canto ao título e en canto a data. Cambiamos A expedición do Pacífico por A praia dos afogados de Domingo Villar. E a pesares do atraso, moitos de vós non fuches capaces de rematalo. Non pasa nada. Coido que, como Diego (4º A) na súa peculiar presentación non desvelou o nome do asasino, pode ser esta unha boa lectura para o nadal. A sesión viuse moi fornecida pola aportación de Alex Segura (1º de Bach) quen fixo unha estupenda presentación nun novo formato (prezzi) do clásico do que falaramos na sesión pasada: Un mundo novo feliz de Aldous Huxley que esperamos poder enlazar no blog. Parabéns aos dous! Soamente me queda desexarvos a todos os membros do noso Club (e a todos os usuarios da biblioteca en xeral) unhas Felices Festas e un Ano Novo cheo de lecturas e agasallos. Vémonos o 13 de xaneiro coa última parte da magna saga entre as sagas: Harry Potter e o misterio do príncipe.

domingo, 30 de novembro de 2014

SILVAR NO NOSO CENTRO

O venres 28 de novembro estivo con nós na Biblioteca Xoán R. Silvar no marco das actividades realizadas neste “Novembro, mes da ciencia en galego”. Despois de máis de trinta anos no Sofía dando clase a varias xeracións, Silvar volveu para falar aos alumnos de 2º ESO de “Lingua(s) e ciencia”. A ciencia, os tipos de ciencia, a linguaxe científica, as linguas da ciencia, a investigación da musicóloga suíza Dorothé Schubarth en colaboración con Antón Santamarina e as razóns de por que el, un rapaz de Ferrol, comezou a usar o galego na súa vida particular e profesional, foron varias das cuestións tratadas na súa exposición. Uns poucos privilexiados de 2º ESO B quedaron máis tempo e o bombardearon con preguntas sobre algunhas das facetas da súa vida: a música, a ornitoloxía, o medio ambiente, a súa tarefa como profesor, etc. Moi interesados parecían… Haberá entre eles algún futuro científico?







Continuará… Porque novembro acabaría, pero nós continuamos lendo ciencia na biblioteca e fóra dela.
CientificaMente, no Sofía.





mércores, 26 de novembro de 2014

SE POSPÓN A NOSA XUNTANZA PARA O MARTES 16 DE DECEMBRO

Ola rapaces!
Como se veñen os exames enriba, decidimos pospoñer a xuntanza de decembro para o día 16 no que estaredes máis relaxados. 

Supoño que todos saberedes que tamén cambiamos a lectura e que a que nos toca é A praia dos afogados de Domingo Villar que moderará Diego Pereda de 4ºA. Aínda que é un bo tocho, penso que vos gustará moito porque é unha emocionante intriga chea de asasinatos, sospeitosos, víctimas. Todo elo nun coñecido e fermoso paisaxe das Rías Baixas. E formando parte dunha investigación ben levada por esa peculiar parella de detectives que forman o galego Leo Caldas e o seu axudante aragonés que non acaba de entender a idiosincracia do país.
Esta saga de misterio esta sendo moi ben acollida polo público e a crítica. E tamén máis aló das nosas fronteiras.

Estaría ben que me levárades de roteiro literario pola escea do crimen.



sábado, 22 de novembro de 2014

EXCURSIÓN POLAS FRAGAS DO EUME

Pois si, o pasado xoves saín do meu recuncho nunha cestiña que levaba unha rapaza moi agarimosa de 4º C e deime unha camiñada esgotadora, malia que tonificante, polas Fragas do Eume.



Á baixada fun pingando de tanta chuvia que non cesaba de caer, Mi madriña! Case que afogo no cesto. E por pouco afúndome no fango. Mais foi chegar ao misterioso e vello mosteiro de Caaveiro, comezar a saír o sol, e atoparme cunha afastada póla da miña ampla familia: os Soqueiron de Pontedeume. Son descendentes directos do abade de san Xoan e levan alí moitos séculos coidando das sacras pedras. Invitáronme a visitar as dependencias do mosteiro e abraieime coas fabulosas vistas que disfrutan do río e do bosque. Gustoume de xeito especial o muíño e a ponte, onde botei unha man ás traballadoras rapazas a recoller follas, froitos, fieitos, cogumelos para unha gran exposición que terá lugar na entrada do instituto. Á volta, a forza do sol era xa moita e a subida foi toda unha demostración de pundonor por parte de todos: profes, rapaces e mais eu, mascota. Disque camiñanos máis de nove kilómetros e todos pasamos a proba con nota.


Agora compre rematar a nosa exposición e esperar aos vosos fermosos e fantasticos relatos de bosque. Gustaríame protagonizar algún, máis sempre me repiten que non debo ser tan vaidoso. Así que escribide do que queirades, pero non deixedes de facelo.


E, prégovos, levademe máis veces de excursión! Veño novo.

martes, 11 de novembro de 2014

A NOSA XUNTANZA SOBRE DIVERGENTE

Hoxe tivemos a nosa xuntanza sobre a primeira lectura: Divergente de Veronica Roth. Tivemos o gusto de contar con novas incorporacións como Pepe de segundo de Bacharelato e Luis de primero de ESO, e tamén coa visita dun profesor do IES Ferrol Vello, que veu para coñecer por dentro a dinámica dun Club co obxectivo de montar o seu no seu centro.
A presentación fixérona, moi ben por certo, Xiana Santiago e Lydia Ramos, de 4º de ESO C, e pronto a subiremos ao noso correspondente recuncho do blog. 
Sobre a novela houbo disparidade de criterios. A Alicia non acabou de convencerlle este libro. A Daniela gustoulle moitisimo (pregúntome cando algo non lle gustará a esta rapaza devoralibros). Como non, a obra se prestou as comparacións con outras da temática da distopía como a famosa saga Os Xogos da Fame de Suzanne Collins. Mesmo algúns de nós fixemos o test para saber en que facción entraríamos mellor ou se somos diverxentes.
Por certo, Ana falounos da obra fundacional desta temática, Un mundo feliz, de Aldous Huxley, e moitos mostraron o seu interés por lela. Así me gusta. Que novelas chamadas xuvenis nos leven a grandes clásicos.
Decidimos facer un cambio na orde de lecturas. Así que para o vindeiro mes, a novela que imos ler é A praia dos afogados de Domingo Villar, todo un refrescante caso misterioso para o detective Leo Caldas.
Boa lectura!


A NOSA BIBLIOTECA NAS V XORNADAS DE BIBLIOTECAS ESCOLARES DE GALICIA

O fin de semana pasado tiveron lugar en Santiago as V Xornadas de Bibliotecas Escolares de Galicia. Nelas, a nosa compañeira Ana Seco fixo unha presentación que co título: "Alfabetizacións múltiples: experiencias de lectura no IES Sofía Casanova" expuso a transformación sufrida pola biblioteca dende que formamos parte do PLAMBE. A presentación apoiabase nun site que pode consultarse aquí.
Falounos de proxectos nos que moitos de nós participamos: Clubes de Lectura, Hora de Ler, Blogues, Itinerarios Lectores como o das Meninas, roteiros, publicacións como os libros de Rosalía o de Marcos Calveiro.
Foi ampliamente seguida e felicitada polos asistentes. E todos nos sentimos moi ledos e orgullosos desta aportación para que poida servir a outros profesores e alumnos.


xoves, 16 de outubro de 2014

DIVERGENTE

Como xa sabedes os que estivechedes na primeira xuntanza, a nosa vindeira lectura é Divergente, o primeiro volume da saga escrita por Veronica Roth. Coido que moitos xa a coñecedes, polo menos pola súa versión cinematográfica. Para outros será unha ocasión de achegarnos a esta exitosa narración que mestura elementos, polo que teño escoitado de vós, de distopía, ciencia-ficción, e historia de superación e amizade.


Tenme moi boa pinta, máxime coa nova de que van ser Lidia e Xiana, rapazas de 4ºC, as que nos fagan a presentación o vindeiro 11 de novembro.


Aproveito para animar aos fans das boas historias a apuntarse no noso Club. Penso que o agradeceredes.


mércores, 15 de outubro de 2014

PRIMEIRA XUNTANZA DO CLUB DE LECTURA

Que ben o pasamos onte no noso reencontro do Club de Lectura! Foi estupendo vervos tan relaxadiños (coido que o novo sofá tivo algo que ver nisto), tan animados e con tantas ganas de ler. Dende o meu recuncho apuntei algunha das vosas suxestións que recoñezo que eu non coñecía. Encántame que sempre me tedes ao día das novas sagas de literatura xuvenil que van aparecendo. 
Estas son algunhas das que apuntei:

  • El corredor del laberinto.
  • La memoria del agua.
  • Ciudades de papel.
  • El designio del ángel.
  • Fablehaven.


Aproveito para dar a benvida a Sabela, María e Laura, rapazas de 1º de ESO que son novas incorporacións ao noso Club. Espero que pouco a pouco vaian animándose máis de 1º e tamén de 1º de BAC. Non vos arrepentiredes.
E, por suposto, quero dar as grazas aos incondicionais que levan cinco anos adicándonos tempo e ilusión para facer posible esta gran familia que se chama "Club de Lectura do Sofía."

luns, 13 de outubro de 2014

VÉMONOS MAÑÁ

Ola rapaces!
Non esquezades a nosa xuntanza de mañá! Vide todos -vellos amigos e novas  incorporacións- con moito ánimo para empezar a nova tempada, na que esperamos sorprendervos con boas recomendacións de lectura.
Ata moi pronto.
Socas

xoves, 9 de outubro de 2014

O francés Patrick Modiano gaña o Nobel de Literatura 2014

Ola poetas:


Comeza un novo curso e con el centos de novidades. Entre elas hoxe destacamos a concesión do premio Nobel de literatura ao escritor francés Patrick Modiano, un novelista de educación exquisita -entre os seus mestres está R. Quenau, aquel de Exercicios de estilo-. Modiano ten organizada a súa obra literaria en torno ao motivo recurrente da ocupación nazi de Francia durante a segunda guerra mundial. Os personaxes da súa obra son dunha enorme fondura humana, aínda que os seus comportamentos non son sempre moi racionais nin emocionais. Entre os recoñecementos á súa obra, conta co  prestixioso premio Goncourt e co premio da Academia Francesa e agora co Nobel. 

A continuación, déixovos un fragmento dunha das súas obras traducidas no noso país. A obra trata dun detective xubilado que emprende a tarefa de reconstruir a súa propia identidade, o cal o levará a facer unha profunda análisi da época da ocupación alemana.

Espero que vos abra o apetito. De ler. Máis. 


La calle de las tiendas oscuras (fragmento)
" Un expediente andaba rodando por encima de una mesa. A lo mejor era el del hombrecillo moreno de mirada espantada y rostro abotagado que nos había encargado que siguiéramos a su mujer, quien, por las tardes, iba a reunirse con otro hombrecillo moreno de rostro abotagado en una pensión de la calle de Vital, cerca de la avenida de Paul Doumer. Hutte se acariciaba pensativamente la barba, una barba canosa, corta, pero que se le comía las mejillas. Los ojos saltones y claros miraban al vacío. A la izquierda del escritorio, la silla de mimbre en que me sentaba yo durante las horas de trabajo. Detrás de Hutte unas baldas de madera oscura cubrían la mitad de la pared; había en ellas guías telefónicas y anuarios de todo tipo y de los últimos cincuenta años. Hutte me había dicho con frecuencia que eran herramientas de trabajo insustituibles de las que no pensaba desprenderse nunca. Y que esas guías y esos anuarios formaban la más preciada y la más emotiva biblioteca con que pudiera contar nadie, pues sus páginas recogían multitud de seres y multitud de cosas y de mundos desaparecidos, de los que ya sólo esos tomos daban testimonio. "

mércores, 1 de outubro de 2014

ARRINCA A NOVA TEMPADA

Ola rapaces! 
Como xa vos vexo algo intranquilos preguntando cando comezamos, aproveito este foro para anunciar o inicio da nova tempada, e xa vai pola quinta se os cálculos non me fallan.
Entón, o vindeiro martes día 14 de outubro teremos a primeira xuntanza. Os que queiran quedar a comer que traian o seu bocata. Os que prefiran vir logo que veñan ás 15,30 con moitas ganas de comezar a ler, falar de libros e de todo o que se nos ocurra.
Esta invitación quere mobilizar especialmente aos novos alumnos. Os pequerrechos de 1º ESO, pero tamén os de 1º de BAC e todos os que este ano queiran disfrutar desta experiencia que, está demostrado, enriquece a todos.
Vémonos pronto!

martes, 2 de setembro de 2014

BENVIDOS DE NOVO A NOSA BIBLIOTECA!

Ola rapaces!
Logo do paréntese estival vémonos de novo polo instituto. Polo de agora imaxino que andades a facer os exames e estades un pouco nerviosos. Deséxovos moita sorte. E espero que cando rematedes veñades a facerme unha visita á biblioteca, que segue a ser a vosa casa.
Imaxino que tivestes un bo verano. Coido que algúns aproveitachedes para ler ademáis de tomar o sol e facer surf. Xa vos falarei das miñas lecturas e dos plans para o novo curso. De momento solo quería darvos a benvida e recordarvos que aquí seguen os vellos amigos que se agochan nos libros.
Ata pronto!
SOCAS 


luns, 30 de xuño de 2014

NOVAS ADQUISICIÓNS II: CIENCIAS NATURAIS, FÍSICA E QUÍMICA

Como dixemos noutra entrada, a biblioteca está a mercar fondos das áreas de ciencias para actualizalos. De igual xeito que en Economía, os Departamentos de Ciencias Naturais e de Física e Química facilitáronos títulos divulgativos das súas áreas de coñecemento e a biblioteca os adquiriu para uso e disfrute de todos: profesores e alumnos. 
Tedes dende unha biografía novelada de Madame Curie, atá varias novelas que transcurren en laboratorios ou en centros de investigación, a libros divulgativos de astronomía escritos por Stephen Hawking, ou os libros de relatos de Gerald Durrell, entre outras moitas opcións.
Acercade ao panel de itinerarios lectores da nosa biblioteca e disfrutade este verán coas lecturas científicas máis refrescantes.


Ata pronto!

venres, 27 de xuño de 2014

ACTOS DE CONMEMORACIÓN DO 50 ANIVERSARIO

Xa vos digo sempre que estou tan atarefado que as miñas crónicas van saíndo con moito retraso. Pido disculpas de novo. Antes de pechar o curso, convén facerse eco do fermoso acto que o pasado día 18 tivo lugar no salón de actos para celebrar o noso 50 aniversario. Eu escapeime e disfrutei dende o meu recuncho de todo o evento.
Álvaro Gutiérrez fixo de presentador, coma sempre, coa súa soltura habitual. O acto abriuse coa actuación dun cuarteto de corda, no que destacamos a presenza de dúas amigas do noso Club: Inés Amarelo, xa fai máis tempo, e Andrea Trillo, ás que desexamos moitos éxitos musicais e universitarios.
Logo dos discursos da directora, da presidenta da ANPA, do alcalde de Ferrol (exalumno do centro) e do Director Xeral de Política Lingüística, chegou o momento da estrea mundial do documental que fixeron os alumnos da man de Suso. Parabéns polo excelente traballo!
E para rematar o grupo folklórico raparigos, con Juan Silvar ao frente, moi elegantes e afinados puxéronos os cabelos en punta coas súas interpretacións.
Feliz aniversario para todos!

luns, 23 de xuño de 2014

A NOSA FESTA

Pois si, rapaces, a festa de tartas foi un éxito! Xa vai uns días dela, pero estiven moi atarefado rematando a decoración e catalogando novidades e non vos puiden falar do evento amodiño.

Pero non podo pasar por alto facerme testemuña das exquisitas creacións da repostería que mirei e probei o pasado martes. Doces de todos os sabores, cores e formas fixeron que a miña loita cos meus calzóns tiña un pouco máis de épica, porque gañei unhas poucas talliñas de máis. Que imos facer!


Alegreime especialmente de atoparme cos rapaces de 2º de Bacharelato como Luis, María, Andrea, Carolina, Álvaro e Elisa, que non esqueceron vir a visitarnos antes de partir, algúns para os seus destinos universitarios. Grazas.


E a todos, deséxovos moita sorte coas notas (que a vais ter) e un verán chéo de diversións e bos libros! 

Vémonos o curso que ven.

sábado, 14 de xuño de 2014

V FESTA DAS TARTAS LITERARIAS

Rapaces, o que estábades esperando xa esta aquí, a nosa increíble despedida, a nosa insuperable FESTA DAS TARTAS! 
Vos esperamos a todos, e tamén aos que remataches o selectivo e sempre nos seguistes fielmente.
Non esquezades traer a mellor das vosas creacións de repostería!



CONFERENCIA DE GUILLERMO LLORCA

Hola rapaces!
Onte, dentro do ciclo de conferencias programadas para conmemorar o Cincuenta Aniversario do noso Centro, tivemos o pracer de escoitar ao noso antigo profesor Guillermo Llorca. Falou dunha "Aproximación a historia da educación en Ferrol" para os alumnos de 4º de ESO e 1ª BAC. A presentación estivo a cargo de Román, o profe de Latín, que lembrou con agarimo os 27 anos compartidos con Guillermo nestas mesmas aulas.

Guillermo recoñeceu a algún dos seus antigos alumnos entre o auditorio e, coa súa ironía habitual, nos ilustrou sobre os retos que para acadar unha educación pública e universal de calidade na nosa cidade os nosos ancestros houberon de superar. Dende os lonxanos tempos en que había que coller "o vaporcito" a Coruña para examinarse alí, pasando polas academias, internados, escolas de maestría, colexios relixiosos, británico... ata chegar ao primeiro instituto da cidade, o Concepción Arenal. E logo, fai agora cincuenta anos, chegamos nós, o feminino, o Sofía Casanova. 
Rematamos cunha boa pregunta que lle fixo Guillermo a André Múñiz e que nos vén ben a todos para reflexionar: 
Por que agora, con tantos medios e facilidades, non saen máis Premios Nobel entre os nosos alumnos?
A ver si algún se aplica o conto!


xoves, 5 de xuño de 2014

MICROESCRITURA

Pedimos a Emilio que nos contara a experiencia do Obradoiro de Escritura que dirixe e o fai ao seu estilo:

OBRADOIRO DE (micro)ESCRITURA

Todo texto breve que empeza e ¿acaba? é microescritura. Que sexa literatura é outro cantar, pero no horizonte do Obradoiro (OmE) tal condición aparece xa desde o principio como a súa finalidade natural. No fondo, como Kipling, todos queremos escribir o conto máis fermoso do mundo.
Velaiquí un listado improbable de microxéneros:
  • Titular xornalístico Aforismo Anécdota verídica / sucedido pintoresco
  • Haiku Esquela Discurso político mitineiro Graffiti Greguería
  • Carta de amor Carta de desamor Carta de odio, directamente
  • Nota de suicidio (exemplar, se é de Vila-Matas) Panxoliña
  • Escolio a un texto implícito Chiste verde (ou non) Chiste mariano Xaculatoria
  • Programación Didáctica Post-It para neveira ou lavalouzas
  • Informe do psiquiatra forense de garda Atestado policial Adiviña, adiviñanza
  • Informe do profesor encargado da aula de convivencia Jingle publicitario Caligrama
  • Nome de pía de Agustín Lara (microxénero hápax legomenon)
  • Solicitude de emprego doméstico no taboleiro do súper Message in a bottle
  • Pregunta capciosa / filípica, de polo menos 2 tonantes minutos, con 4 subordinadas, 3 aposicións (unha delas digresiva meramente) e 5 ½ finas ironías do profe de Filosofía
  • Anuncio de bebida isotónica Pesadelo por escrito Epitafio Entrada do D.R.A.E.
  • Entrada do día de San Valentín do mítico Diaaaario adolescente (con ou sen debuxiños de corazóns, smilies, coitelos, faragullas e unicorños rosas)
  • Nota de prensa, sección Ecos de Sociedade Receita de cociña luguesa caseira
  • Instrucións de montaxe dun armario de lavabo Godmorgon con 2 caixóns
  • Declaración de (boas) intencións de Primeiro de Ano Pé de foto
  • e CONTO CURTO


Temos a intención de continuar o ano que vén, pero polo de agora levamos feito:
- algunha pescuda de microxéneros de xornal
- un intento de conto fantástico-humorístico que non callou ( a outra proposta era algo de dark fantasy, pero alguén tiña medo de sufrir pesadelos, e desbotouse)
- variacións sobre o coñecido microrrelato do dinosaurio de Monterroso
- un conto a 4x2 mans algo tolo, e aínda por rematar
- unha pequena obra de teatro aportada por Diego
- fragmentos para lectura e discusión da opus magnum de Pepe, “Leyendas de Jinmei”
- unha dicusión sobre a posible mascota do OmE (un librocán, un gatolibro, un librogatocán, un rato de biblioteca escribidor, …), con suxerencias para dibuxala

Do dito xa se bota de ver que hai máis futuro que presente no OmE, e máis brincadeira que académico currículo tamén. A cousa évos perder o medo a que se lea o que escribides, pasalo ben e ¿mellorar? co tempo.

Emilio dixit.

CONFERENCIA DE CHARO MARTÍNEZ SOBRE SOFÍA CASANOVA

Dentro dos actos programados para celebrar o noso cincuentenario, o martes pasado tivemos o pracer de escoitar á sabeduría feita persoa, a Charo Martínez, antiga profesora e máxima especialista mundial sobre a figura de Sofía Casanova. Que ben o fixo! Que ameno! Que profundo, á vez! Fomos uns privilexiados de asistir a dita conferencia e que a partir de agora ningún de nós poderá dicir que non sabe por que se chama así o seu instituto.
Penso que deberiamos aproveitar máis esta oportunidade e volver invitar a Charo o vindeiro ano. Tal vez ao Club de Lectura, onde poderiamos plantexarnos ler algunha das obras da escritora coruñesa. Que pensades, rapaces?

GRAZAS, CHARO!


mércores, 4 de xuño de 2014

GRADUACIÓN DA 50 PROMOCIÓN

O venres pasado, no noso reestreado salón de actos tivo lugar unha das cerimonias máis entrañables que poden celebrarse no curso académico, a graduación dos novos bachareis. Todos eles moi fermosamente ataviados coas súas mellores galas. Os mestres de cerimonia foron Álvaro e Vanessa e entre as actuacións das que poidemos desfrutar destacamos: o baile flamenco de Raquel, as cancións de Enrique, a música do grupo do conservatorio no que actuaban Álvaro e Laura. Non faltaron, claro, os discursos da nosa directora e de dúas alumnas, Yaiza e Andrea. 
Os alumnos tiveron o detalle de premiar o labor dos nosos compañeiros que van xubilarse como Enrique, Manu, Mariano, María José e Luis.
Logo dun piscolabis no patio, fomos cear no local do Toxos e Froles. E a festa durou ata altas horas da madrugada.  
Parabéns a todos e agora moito ánimo para o selectivo!

2ºB coa súa titora, Concha

luns, 2 de xuño de 2014

ESTREA DA OBRA "O TESTAMENTO DO TÍO NACHO"

A semana pasada tivo lugar no noso recentemente arranxado salón de actos a representación da obra baseada no conto de Francesc Eiximenis, O testamento do tío Nacho dirixido polo profesor de Matemáticas José Luis Paz e protagonizada por alumnos do grupo de teatro do noso centro. Estes alumnos (pertenecentea a cursos dende 1º ESO a !º BAC) levan ensaiando todo o ano con moita ilusión para aportar o seu grao de area aos actos de celebración do 50 aniversario do IES Sofía Casanova. Destacamos o bo facer de todos (actores, técnicos, decoradores, músicos...) que nos fixeron pasar un bo rato coa avaricia da Maruxa para sacar o máximo proveito da herdanza do seu home.

Cartel realizado por Antía López

sábado, 31 de maio de 2014

FINALISTA DO CONCURSO DE RELATOS DE COCA-COLA

Seguindo a tradición do noso centro, unha alumna nosa resultou finalista na edición deste ano do Concurso de Relato Curto de Coca-Cola. Maite Saavedra Rodríguez de 2º A recolleu o seu agasaio o venres día 23 de maio acompañada dos seus pais e das profesoras de lingua Juani e Pilar. E todo nun marco inesquecible, a tan literaria illa de San Simón. 
Deixámoos co seu relato:



"La televisión está encendida. Un leve murmullo recorre la habitación. Han desparecido todos los diccionarios del mundo. Apago la televisión y me dirijo a la puerta de la calle. Fuera, la tormenta parece que va a arrancar los edificios de cuajo. Comienzo a andar hasta llegar a un lugar donde nadie pueda verme. Allí, un hombre alto, de aspecto enojado y barba blanca me está esperando.
-Buenos días- lo saludo.
-Buenos días.
Entramos en una especie de bar, oscuro y con poca gente. Allí, nos sentamos en una mesa apartada y el hombre me entrega un paquete.
-Toma- me dice-, es el último.
Acepto el objeto y me levanto de mi sitio dispuesta a salir, pero antes de que mi mano agarre el pomo de la puerta, algo me agarra bruscamente el brazo y me impide salir.
-El dinero- dice el hombre.
-Aquí tiene- le contesto- .40, 90 €. Todo lo que me pidió.
Salgo fuera y me dirijo al aeropuerto. En el camino me paro a pensar en todo lo que estaba pasando, y me da un escalofrío. Una vez en el aeropuerto, tomo el primer avión que sale de la ciudad y me voy: por fín estoy libre.

* * * * * * * *
Diez años después, llaman a mi puerta, a mi nueva puerta, y abro. –Buenos días señorita Parker, ¿podría usted invitarme a pasar?- Yo accedo, al fin y al cabo, no puede pasarme nada peor que lo ocurrido diez años atrás. El hombre entra en mi casa, y hasta que no me lo dice, no le encuentro nada familiar en él.
-¿Se acuerda de mí? Yo la ayudé a cometer todos los delitos que hizo antaño. Todos, toditos. ¿Recuerda?
Entonces recordé. Lo recordé todo: quién era, por qué había venido, qué era lo que estaba pasando.
-¿Qué pasa?-dije- ¿vienen a por mí?
-Me temo que sí, señorita.
El hombre había cambiado mucho en estos últimos años: era más amable, se había afeitado la larga barba blanca y, además, parecía no necesitar dinero.
Recojo todas mis cosas y me dirijo a la puerta, dispuesta a escapar de nuevo. Pero, por desgracia, ya me estaban esperando.
-¡Alto ahí! No dé ni un paso más- gritan unos hombres de aspecto policial.
Me paro en seco. Todo lo que había hecho, durante tantos años, había sido en vano. ¿Por qué? ¿Por qué tuve que hacerlo? ¿Por qué tuve que robar todos los diccionarios del mundo? Simplemente, por venganza. Desde niña, todos los profesores hablaban de los diccionarios como la mejor herramienta del mundo. Pues no. Muchas de las palabras que utilizamos en la vida cotidiana no aparecen. ¿Por qué? Eso no tiene explicación.
Mientras me dirijo a comisaría pienso en lo que voy a decir. No voy a mentir, Al fin y al cabo, mi misión está cumplida.

Maite Saavedra Rodríguez


mércores, 28 de maio de 2014

CELEBRANDO AS LETRAS GALEGAS NA ÁREA DE EDUCACIÓN PLÁSTICA E VISUAL

A profesora María Lanza, pasounos información sobre a preciosa iniciativa coa que celebraron os alumnnos de 4º ESO o recente Día das Letras Galegas.

"Desde a área de Educación plástica e visual traballamos en colaboración coa biblioteca os poemas de Xosé María Díaz Castro, coa intención de deseñar unha letra capitular que connotara as ideas e sentimentos do poema, é dicir, de darlle imaxe á palabra. Despois decidimos incluír unha estrofa ou poema no deseño dun marcapáxinas para conmemorar ese día.



Proceso de traballo:
1º.- Lectura do poema, análise do que nos transmite.
2º.- Braintorming ou “chuvia de ideas”.
3º.- Documentación: buscamos en Internet información sobre o escritor e os seus poemas, imaxes de deseños de letras capitulares, ilustración…
4º.- Bocetos, selección dunha idea e desenrolo da mesma.
5º.- Letra capitular branco e negro e color.
6º.- Deseño do marcapáxinas.



RELATO SURREALISTA


Paralelamente ao desenrolo do proxecto anterior, algúns alumnos en colaboración con Lingua Castelá (Daniel Iglesias) traballaron o texto surrealista escrito por eles coa mesma proposta do proxecto letras galegas."

Efectivamente, todos poidemos desfrutar dos estéticos marcapáxinas que adornaron a entrada do centro. O gañador foi o de Nevia Lamas, pero os finalistas tamén estiveron moi ben. Deixamos mostra do galardonado e de detalles do proceso de creación da letra capitular:


Parabéns a todos por esta fermosa iniciativa!

xoves, 22 de maio de 2014

SESIÓN DO CLUB DE LECTURA

Ola rapaces! 
Como traballamos tanto, non dou máis de min para recoller todas as nosas actividades. O pasado martes tivemos a anunciada sesión sobre Calpurnia, a cargo dos irmáns Losada. Estivo moi completa e ata viñeron a gravarnos os compañeiros que están a facer o documental sobre o cincuentenario do Sofía. Toda unha experiencia para nós.


Con esta obra, que gustou a todos (a Ana e Pilar, polo que ten de recordo das súas lecturas sobre a América do dezanove; aos rapaces, polas travesuras de Callie e máis os seus irmáns; a Cristina, polo reflexo da época do comezo do darwinismo; a Laura, pola defensa do papel da muller fora do rol tradicional... ), rematamos as nosas lecturas. Xa sólo nos queda a nosa Festa de Tartas Literarias, que anunciaremos como se merece neste lugar.

Grazas a todos por estar aí mes tras mes.


NOVAS ADQUISICIÓNS DA BIBLIOTECA I. ECONOMÍA

Ola compañeiros!
Dentro do PLAMBE (é dicir, os cartiños para gastar que nos concedeu este curso a Consellería), non só están as melloras que saltan a vista:
. Pintura nova.
. Porta de cristal.
. Ordenadores postátiles e impresora.
. Cámara de seguridade.

Senón que, por suposto, están todos os fondos bibliográficos (LIBROS, PELIS) que a biblioteca está comprando. Este ano decidimos completar algunhas materias do currículo como era o caso do Departamento de Economía.
Baixo o asesoramento de Iñaki, a biblio mercou unha serie de traballos divulgativos sobre a nosa situación económica, a crise, a mentalidade emprendedora, os microcréditos, etc...
E están a vosa disposición.
Xa sabedes. 

A CULTURA NOS FAI MELLORES.

MÁIS LIBROS: MÁIS LIBRES


luns, 19 de maio de 2014

A NOSA NOVA XUNTANZA

Aproveito para recordarvos que mañá temos a nosa nova xuntanza do Club de Lectura. Nela os irmáns Losada, Roberto e Tomás, falarannos da novela de Jacqueline Kelly: A evolución de Calpurnia Tate
Non faltedes. Xa sei que tedes moitos exames pero un pequeno esforzo máis paga a pena. Pensade que é a última das sesións e logo xa teremos a nosa festa de tartas literarias. Acordádevos de traer a comida.
Vémonos!

ÁFRICA: IMAXE E PALABRA

Ola rapaces, cedo a palabra a nosa compañeira Antía, para que nos glose os obxectivos da preciosísima exposición fotográfica que adornou o noso corredor:

O punto de partida da exposición de fotografía e poesía africana estivo en dúas escolmas poéticas: Poemas a la madre África, realizada por Xosé Lois García, e Coraçao en África de Francisco José Tenreiro. Estas dúas ofrecían unha presada de versos en lingua portuguesa e era interesante comprobarmos, unha vez máis, que o coñecemento do galego nos permite comprender de xeito doado a lingua da comunidade lusófona. Comunidade cun amplísimo número de falantes ao longo do mundo, neste caso no mundo africano. As imaxes quixeron ser un apoio que reforzase a palabra. Aparecían tanto paisaxes coma rostros, que falaban de sufrimento e dignidade. Esta exposición quixo ser unha ventá aberta para a reflexión desde as aulas sobre un continente que está petando ás nosas portas e ás nosas conciencias. A súa difusión veu coincidir coa lectura de Palabras de auga, obra tamén situada en África e cuxo autor estivo entre nós para falarnos tamén deste continente.


Rematamos cunha poesía:

Que ninguém o esqueça.

Todos os dias alguem dá a vida
para que seja possível o amor
para que no rosto das crianças
baile un sorriso.

Todos os dias alguém combate
armado apenas de coragem
e de decisao
para que os passaros voem
e as flores rebentem
sobre o solo querido da nossa terra.

Todos os dias alguém morre
en luta pela liberdade
todos os dias alguém morre
para que nós tenhamos vida.



martes, 13 de maio de 2014

MÁIS E MÁIS ACTIVIDADES. MARCOS CALVEIRO CONNOSCO

Ola rapaces!
Socas non dá abasto para resumir todas as actividades que están tendo lugar na nosa biblioteca.


Os de segundo da ESO (e algúns afortunados de 1º) tiveron a sorte de escoitar a Marcos Calveiro falando do seu libro Palabras de auga. Grazas a alumnos de 2º B como Raquel e Juan, Socas pode resumir algunhas das súas ideas. 
Contounos que se inspirara nunhas imaxes dun xornal onde unhas rapazas africanas collían as sementes que as formigas apañaban para comer elas. Tamén que moitos nenos están escravizados nas minas recollendo un mineral para fabricar os móbiles. Falounos dos costumes dos pobos masais, como o xogo do bao, que é coñecido en todo o mundo. Tamén das súas características físicas extraordinarias xa que son grandes corredores e atletas. Todos os anos organiza unha carreira onde participan os rapaces e deciden quen representara a dito país nas Olimpíadas. 
Cando unha rapaza lle preguntou que por qué lle gustaba tanto ler, el respondeu que o coñecemento nos fai libres.
Grazas a Marcos por compartir a súas experiencias.


Podedes disfrutar de todo o anterior no seguinte enlace


mércores, 30 de abril de 2014

DOBRE SESIÓN DE CLUBS DE LECTURA

Onte tiven moito traballo na nosa biblioteca. Unha dobre sesión de Clubs de Lectura. Ao mediodía, o de alumnos. A media tarde, o de país. Desta última falareivos no blog de adultos. 
Na primeira asistiron menos alumnos que habitualmente pola presión dos exames. Quedaron as dúas fundadoras, por así dicir, máis unha mostra de escollidos rapaces que xa non comen pizza pero si uns bocadillos que me teñen moi boa pinta. Logo para a sesión, apareceron máis alumnos. Rodrigo e Jorge de 1º ESO presentaron a lectura deste mes, O último traballo do señor Luna de César Mallorquí. 

Trátase dunha historia que, partindo da selva amazónica, trasládase a Madrid, onde un temible sicario busca vingar un roubo de drogas. No seu camiño tropeza cun rapaz superdotado, Paulo, que vai poñerlle as cousas un pouco difíciles. Acción, amor, amizade, vinganza son algúns dos ingredientes desta trepidante novela de acción.


O noso vindeiro libro xa será o último deste curso. A evolución de Calpurnia Tate de Jacqueline Kelly, unha historia moi diferente da anterior, ambientada a finales do século XIX en Texas e protagonizada por un avó moi particular e unha neta disposta a aprender. 




Disfrutádea!

luns, 28 de abril de 2014

A celebración do día do libro no Sofía.

Ola poetas:

Este ano, adicamos as nosas sesións de lectura do día do libro na bibliotaca do instituto a dous dos máis grandes autores de literatura en castelán: Octavio Paz e Julio Cortázar. Aproveitamos que este ano celebrabamos o centenario do nacemento de ambos autores para preparar un par de páxinas e poder coñecer mellor a súa obra.


A páxina de Julio cortázar é esta. Nela poderedes consultar a súa biografía, ler interesantes e estimulantes textos e, asemade, escoitar a.súa propia voz ou velo nunha vella entrevista de TVE. A páxina de Octavio Paz é estoutra. E tamén poderedes escoitar a súa voz, velo nunha entrevista de TVE e leer a súa obra poética.


As lecturas da semana pasada foron divididas en dous niveis. Así, os alumnos da ESO leron textos de Historias de cronopios y de famas de Julio Cortázar e os de 1º de Bacharelato leron Piedra de sol de Octavio Paz.


Por outra parte, e como non podía ser doutro xeito, tamén aproveitamos a ocasión para lle facer unha pequena homenaxe a Gabriel García Márquez, co gallo do seu pasamento, e limos un relato, "El ahogado más hermoso del mundo",  para afundirnos no real e no marabilloso que tan ben retratou na súa extensa obra. Se o queredes ler, non tedes máis que pulsar aquí

Ata outra, poetas.

luns, 21 de abril de 2014

UNHA PEQUENA HOMENAXE A GARCÍA MÁRQUEZ

No medio do descanso propio desta Semana Santa, mentres algúns preparamos a semana do Día do Libro que está a piques de comenzar, colleunos por sorpresa unha triste nova, o falecemento do grande entre os grandes, do mestre do realismo máxico, do fabulador por antonomasia, do Nobel que engrandeceu a lingua castelá ata facela universal, do colombiano Gabo, Gabriel García Márquez. 

A mellor homenaxe que se lle pode facer é ler as súas obras: Cien años de soledad, El coronel no tiene quien le escriba, La hojarasca, El amor en los tiempos del cólera, Crónica de una muerte anunciada... Ao tempo, estaredesvos facendo un gran favor a vós mesmos porque descubriredes Macondo unha terra máxica e uns personaxes inesquecibles.


Mentres pensamos que máis se lle pode ofrecer dende a biblioteca, convídovos a disfrutar dun pequeno traballo que fixemos desta gran figura. 

Premede aquí para velo.