martes, 24 de abril de 2018

ACTIVIDADES DO DÍA DO LIBRO: 23 DE ABRIL

Ola rapaces!
Parabéns a todos os que participástedes na lectura de poemas de onte. Sodes uns magníficos recitadores de textos. 
Espero que pasárades un bo día e que teñades ganas de ler e de escribir poesía a partires de agora.
Déixovos un vídeo con algunhas imaxes do recital.




luns, 23 de abril de 2018

DÍA DO LIBRO

Ola rapaces e rapazas!

Unha entradiña rápida para felicitarvos a todos polo Día do Libro.
Sabedes que esta semaná está chéa de eventos.
  • Hoxe temos a lectura de poemas por cursos no Salón de Actos.
  • O martes 24 imos a visitar o Club de Lectura do IES Concepción Arenal no que faremos unha homenaxe a Castelao.

  • O mércores 25 imos a Geriatros para celebralo cunha dramatización do Quixote.   


Felices Lecturas para todos!
Cartel do Dpt. de LINGUA ESPAÑOLA

martes, 17 de abril de 2018

OS NENOS DA VARIOLA

Ola rapaces! Esta vez escribo xustiño ao remate da nosa sesión de hoxe sobre a novela de María Solar, Os nenos da variola.


Logo dalgúns problemas de última hora, Carlos fíxonos unha estupenda presentación. Falounos da vida e obra da escritora, presentadora da TVG. Contounos o argumento da novela, baseado en feitos reais, a Real Expedición Filantrópica da Variola, no ano de 1803. Describiunos os personaxes: os nenos (Ezequiel, Clemente, Inés, Benito, Tomás...); os doctores (Posse, Balmis, Salvany); as mulleres (Isabel de Zendal, Candela, a irmá Valentina...). 

Tamén vimos un reportaxe sobre a serie 22 anxos, sobre a historia épica desta expedición.


Como xa é habitual, Eva preparounos un xogo sobre a novela. Esta vez un Kahoot, moi dinámico e divertido.


Espero que vos gustara a sesión. Vémonos pronto.


luns, 9 de abril de 2018

INFOGRAFÍA VOLUNTARIADO

Ola rapaces! 
Deixamos aquí unha infografía na que podedes ver o traballo que está a realizar o grupo do voluntariado da nosa biblioteca. 

venres, 23 de marzo de 2018

UN MUNDO DE LENDAS

Ola rapaces!
Antes que nada, quixera desexarvos unhas felices vacacións de Semana Santa, nas que espero que aproveitaredes para ler e descansar.

Pero antes aínda vos debo unha reseña da pasada xuntanza do noso Club de novela histórica do martes día 20. Con tantos exames e avaliacións, de verdade, que non tiven nin un minuto para facela.
Pero agora é o momento.

Como sabedes, tocábanos ler O frío azul de Ramón Caride, unha apaixoante aventura ambientada en terras que coñece moi ben o autor -nado en Cea-, lugares da montaña ourensá e lucense tan fermosos como Doncos ou Oseira.


Alí mestúranse as lendas da muller corza coas peripecias de Lourenzo o abade. A expulsión dos xudeus coa vida dos monxes do mosteiro de Oseira, un lugar anclado no tempo e aínda hoxe cheo de vida, e que pode visitarse física ou virtualmente


As dúas Danielas fixeron a presentación e logo todos xogamos ao Pasapalabra que nos preparou Eva e que gañou un avantaxado Javi.
Disfrutamos tamén na comida da compañia dos rapaces correspondentes e pasámolo, coma sempre, moi ben.
Vémonos axiña.

xoves, 15 de marzo de 2018

ACTIVIDADE DO VOLUNTARIADO NA PRENSA

Hola rapaces!
Queremos informar de que o día 10-03-2018 saíu pubicada na prensa (La Voz de Galicia) unha nota  que recollía a actividade que realizamos cos maiores do centro Geriatros de Ferrol, o  grupo de voluntariado da biblioteca. Como xa vos comentamos nunha entrada anterior, o motivo da visita foi a charla sobre igualdade que impartiron os avós para o noso grupo de compañeiros. 
Deixámos a imaxe, se picades sobre ela podedes ver a noticia.

CESAR TOIMIL

luns, 12 de marzo de 2018

FOTOS DA CHARLA SOBRE IGUALDADE

Hola rapaces! 
Imos deixar aquí testemuña gráfica da visita que nos fixeron os maiores da residencia Geriatros de Ferrol, dentro das actividades do voluntariado da biblioteca.

sábado, 10 de marzo de 2018

OS NOSOS MAIORES FALAN DE IGUALDADE

Ola rapaces!
O de onte foi unha preciosa experiencia (e van tres) que compartimos con nosos maiores, xa amigos, da Residencia Geriatros.
Antes de que viñeran, o grupo de voluntariado (que cada vez medra máis) comeu na biblioteca, co agasaio habitual de Fran, un rico biscoito de chocolate.
Logo adicámonos a rematar os carteis que xa iniciara Vily cos seus alumnos de 4º. Decoramos a biblioteca con eles e con globos e guirnaldas de cor morada, que simboliza a loita pola igualdade de xénero.


Ás catro, apareceron eles, elas mellor dito. Algunhas xa vellas coñecidas: Macamen, Maruxa, Chelo, capitaneadas polo entusiasmo de Marta. Viñeron a coñecer o noso centro e a falarnos de igualdade. A súa experiencia é moi válida. Maruxa contounos como aos 19 anos casou co seu noivo (e fixose cargo dunha casa de cinco homes). Outra falounos como na súa xuventude era impensable ver a un home no mercado, cociñando ou limpando. 
Moito mellorou a sociedade pero moito máis ten que mellorar. Elas abriron camiño pero a nós toca revertir os prexuízos que aínda quedan. 



Marta axudounos a reflexionar sobre a imaxe que aínda domina na sociedade: os homes fortes que non deben chorar e que protexen ás mulleres; e elas sumisas, débiles e necesitadas de protección.

Logo da charla, fomos ver un ensaio do grupo de teatro e quedaron encantadas. Xosé Luis invitounas á estrea no vindeiro 29 de maio e elas prometeron vir.

Esperamos que a experiencia saia en prensa porque tivemos a visita de dous fotógrafos.

Queda pendente o prometido picnic.



luns, 5 de marzo de 2018

8 DE MARZO DÍA DA MULLER




Nesta semana que celebramos no 8 de marzo, o Día da Muller Traballadora, queremos facer mención a Forges que nos deixou recentemente, recompilando algúns dos seus debuxos, onde a preocupación pola situación da muller é unha constante na súa obra.
Non comenta e reivindica unicamente este día da muller traballadora, senón que recolle moitos temas que son a preocupación de millóns de mulleres no mundo. Con ironía e con humor, unhas veces e con determinación e sarcasmo, outras, condena o machismo, as políticas europeas, as políticas migratorias mundiais e todo un armazón de cuestións que dificultan en todas partes que as mulleres alcancemos a posición de igualdade de dereitos cos homes, que nos corresponde.


domingo, 25 de febreiro de 2018

DESCUBRINDO AMÉRICA CON NOSO CLUB DE LECTURA

Ola rapaces!
O pasado martes 20 tivemos a nosa xuntanza do Club de novela histórica. O libro correspondente era El oro de los sueños do gran escritor leonés José María Merino. Cóntanos as aventuras de Miguel, un rapaz mestizo (fillo dun conquistador español e dunha india) que se embarca nunha trepidante aventura no interior da selva inexplorada. Amizade, amor, traición, ambición son algúns dos ingredientes desta historia tan ben escrita como fiel reproductora da fala, dos costumes dos homes e mulleres que cruzaron o Atlántico na procura dun soño.



David Gutiérrez fixo a presentación tan ben como nos ten acostumados.


E Eva preparounos esta vez unha caza do tesouro con probas baseadas no contido da novela e na historia de América. Entre elas tiñamos que facer un calendario maia que nos quedou moi xeitoso. O premio era moi apropiado, por suposto, ouro, pero tamén o ben máis preciado que atopamos nas Américas: o chocolate.



De novo aprendimos e disfrutamos en partes iguais.
Ata a próxima.
Se queredes seguir a busca do tesouro que utilizamos para esta sesión do club de lectura, aquí tedes as actividades:

venres, 2 de febreiro de 2018

CELEBRANDO O DÍA DA PAZ COS NOSOS MAIORES

Ola rapaces!

O pasado martes, 30 de xaneiro, Día Internacional da Paz, fixemos a nosa segunda visita á residencia Geriatros dentro do programa de voluntariado da Xunta de Bibliotecas Escolares Solidarias. 
O noso grupo inicial de voluntarios vai medrando pouco a pouco. Aos once da primeira experiencia de Nadal sumáronse doce rapaces máis de 4º, animados polo boca a boca e polas palabras dos seus compañeiros. Teño noticia de que algúns pequenos de 1º tamén queren vir na vindeira oportunidade. Estades todos convidados!
Pero cóntovos que fixemos. Logo de comer xuntos, dividimos o grupo entre os recitadores de poemas sobre a paz (de Celso Emilio Ferreiro, Antonio Machado, Rafael Alberti, Blas de Otero, etc) e os deseñadores do cartel. Mentres os primeiros ensaiaban o recitado, estes últimos practicaban o cartel da paz cunha réplica do que iamos levar xunto aos anciáns. 
Ás 4, cando os maiores levantan da siesta, chegamos a Geriatros. A sorpresa foi que como o día acompañaba, Marta a animadora, os colocou nos soportais para aproveitar o soliño. Esperábannos moi animados, cos seus gorros de papel. Pronto todo foi un balbordo de mans novas que axudaban a outras mans máis curtidas a plasmar os seus folgos de paz. Uns botaban pintura, outros limpaban, estes facían pombas da paz, aqueles asinaban e deixaban a súas pegadas. A emoción desbordouse cos recitados de poemas e algunhas señoras decididas quixeron recitar elas tamén. E rematamos cunha mensaxe de ledicia cantando "No dudaría" de Antonio Flores e "La muralla" de Ana Belén, mentres os curiosos peatóns da avenida de Esteiro nos miraban algo sorprendidos.
Foi precioso ver como interactuaban os nosos rapaces cos anciáns e xurdían as conversas e o intercambio de experiencias. Logo axudamos aos maiores a subir á Residencia. De xeito natural cada un de nós encargouse dun ancián. Mais a operación resultou moi lenta.
Unha vez na sala grande de arriba, fixemos as fotos de familia e quedamos en que a vindeira sesión tocaba no noso instituto, onde os maiores queren vir dar eles unha charla. E con esta intención, despedímonos moi impresionados pero moi satisfeitos de ter dedicado algo do noso tempo a xente tan agarimosa e tan chea de sentido.




xoves, 25 de xaneiro de 2018

O CLUB DE LECTURA NA IDADE MEDIA

Ola rapaces! 
Pouco tempo tiven de reflectir por escrito as miñas impresións da última sesión do noso Club de Lectura de novela histórica. Tivo lugar o pasado martes 23 e comentamos o libro de César Mallorquí: La catedral. 

Como  se está facendo costume, decoramos a biblioteca con dúas mesas. A primeira adicouse á construcción da catedral, tema sobre o que versaba a novela (maquetas, ferramentas, obxectos decorativos...) e a segunda á representación dun mercado medieval que adoitaban situarse nas inmediacións das catedrais. Aproveitamos materiais do museo etnográfico do noso IES (cestas, xerras, ferramentas e utensilios domésticos relacionados coas labores do tecido o muiño e outras cos medios para transportar as mercadorías, etc...). Vily deunos unha magnífica clase sobre a tecnoloxía do medioevo.

Eva explicounos moi ben o proceso de deseño destos grandiosos templos. Falounos das diferenzas entre o estilo románico e o gótico. Aprendimos sobre tantos oficios que interveñen na construcción dunha catedral.

Sofía e Deva fixeron a presentación da novela e logo opinamos sobre ela.
Todos, penso, pasámolo francamente ben. E aprendimos a valorar aquilo que os nosos ancestros deixáronos: verdadeiros tesouros de pedra.


xoves, 21 de decembro de 2017

VISITA A RESIDENCIA DE MAIORES


Onte tivemos unha preciosa experiencia visitando aos nosos maiores dentro do programa de "Bibliotecas Escolares Solidarias" no que o noso voluntariado da biblioteca participa nunha experiencia de Aprendizaxe-Servizo. Comezamos unha colaboración coa Residencia de Maiores Geriatros de Ferrol.
Estarédesvos preguntando que é isto  de Aprendizaxe-Servizo. É unha modalidade de aprendizaxe no que o alumnado identifica na súa contorna unha necesidade ou situación en cuxa mellora se compromete, desenvolvendo un proxecto solidario no que pon en xogo coñecementos, habilidades, actitudes e valores.


Un grupo de rapaces (Laura López, Sara Pena, Diego Picos, Daniela Redondo, Daniela Katrib, Carolina Gallardo, Efrén Vázquez, Javi Vilas, Sabela Deibe, Sara Ladra, Paula Martínez) adicaron o seu tempo para acompañar aos anciáns durante unha hora. Recitaron textos de poetas tan recoñecidos como Machado, Miguel Hernández, Alberti, Becquer, Benedetti, Manuel María, Espronceda...

Atopamos un público moi entusiasta e agradecido ata o punto de que planificamos novas citas con diferentes actividades para este curso. Eles queren visitarnos e vir a ver a nosa biblioteca e a nosa obra de teatro.


Esperamos ver pronto por aquí aos nosos avós.



El CHICO DE LA FLECHA

Ola de novo!
Antes de que me esqueza e que remate o día, poño aquí as fotos desta xornada tan divertida na que recordamos o mundo de Roma e o mundo castrexo. 


Lembrade que podedes ampliar información sobre estas civilizacións na cantidade de libros que sobre o tema temos na biblioteca a vosa disposición.

Grazas as aventuras de Marco e Aselo, os protagonistas de El chico de la Flecha de Espido Freire, coñecimos a cidade romana de Emérita Augusta e a maneira de vivir dos hispanos durante o século I d.C. 


Para descubrir os lugares onde transcorre a vida destas personaxes podedes consultar a seguinte presentación.







martes, 19 de decembro de 2017

ACTIVIDADES DESTA SEMANA

Ola rapaces!

Xa sei que está semana estades moi cansos, desexando coller as vacacións de Nadal. Pero lembrade que aínda vos temos preparadas varias actividades para despedir o trimestre:


Hoxe temos a sesión do itinerario de novela histórica correspondente a Roma. Ilustrarase coa lectura de El chico de la flecha de Espido Freire. Decoramos a biblioteca con ambientación da época. Podedes vir disfrazados de personaxes tanto do mundo romano (lexionarios, gladiadores, senadores, damas...) como do mundo castrexo (guerreiros, damas...)


Mañá, dentro do programa de bibliotecas escolares solidarias, teremos a primeira visita a residencia de anciáns Geriatros, onde recitaremos poemas de autores da literatura castelá e galega por parte dun grupo de voluntarios que agasallan co seu tempo e co seu agarimo aos nosos maiores.